جدید پنجابی شاعری
پندھ
ساڈیاں لمیاں عمراں لماں جیون
ورھیاں دا ایہہ جیون اساں پل پل کر کے کٹیا
ڈنگر کھادے، دریا پیتے، ان مکایا
فر وی بھکھے
کجھ نہ پلے
کجھ نہ کھٹیا
ٹردیاں ٹردیاں ساری دھرتی گاہی
پیر وی لمے ہوئے
فیر وی پندھ نہ مکیا
اساں ٹوئیاں وچ بہہ کے
اسماناں ول تکیا
ساڈیاں نظراں لمے پینڈے کیتے
سورج توں وی پراں ویکھن دا چارا کیتا
اکھیاں انھیاں ہوئیاں
کجھ نہ تکیا
مرن دی خاطر
سوچ دی سپولی چڑھ گئے
فر نہ موئے
ساڈے جُچے پتھر ہوئے
نہ ہسنے نہ روئے
طفیل خلش
No comments:
Post a Comment
Note: only a member of this blog may post a comment.