جدید پنجابی شاعری
تینوں تے بس رِشتے داراں چھڈیا اے
مینوں میرے جِگری یاراں چھڈیا اے
سجن بیلی سوہنا وِیر تے ساؤ پُت
مینوں میرے سب کرداراں چھڈیا اے
اس توں بعد لکیراں دا پندھ رُک جاندا
جد وی نقطے نوں پرکاراں چھڈیا اے
جنہیں سر کجیا سی ننگیاں اِٹّاں دا
اوسے چھت نوں اج دیواراں چھڈیا اے
اس دے نال کسان دی پُوری نہیں پینی
جِنی فصل نوں ساہوکاراں چھڈیا اے
میں پُھل کلیاں ویچ کے مال نہیں کھٹیا
میں گلشن نوں وِچ بہاراں چھڈیا اے
ہُن اس چور نوں کون پھڑے گا یار ظفر
جِس کُڑمے نوں پہریداراں چھڈیا اے
ظفر اعوان
No comments:
Post a Comment
Note: only a member of this blog may post a comment.