جدید پنجابی شاعری
کیہ دساں کس حال اِچ لنگی کُجھ نہ پُچھ
لیر جیویں وِچ کِکراں ٹنگی کجھ نہ پچھ
سوچاں دے میرے اندر مقتل بن گئے نیں
اینج دی ہووے خانہ جنگی کجھ نہ پچھ
ویلے مینہ پتھراں دا جد وسایا تے
کیویں نسے ساتھی سنگی کجھ نہ پچھ
کون کوئی اے کِنے کنوں ماریا اے
لاش پئی اے لہو وِچ رنگی کجھ نہ پچھ
دُکھاں دے سپ جثے کُنڈل مار لیا
جندڑی رِہ گئی لُوں لُوں ڈنگی کجھ نہ پچھ
صفت بتاں دی سُندے رب دی سُندے نئیں
سوچاں دے وچ اینی تنگی کجھ نہ کچھ
ظلم اِیویں دے کیتے ظلم دے سائیاں نیں
خلقت جد ذرا وی کھنگی کجھ نہ پچھ
ایہہ توحید توحیدی ایویں لبھدی نئیں
جثے چِردے نال نیں کنگی کجھ نہ پچھ
عبیداللہ توحیدی
No comments:
Post a Comment
Note: only a member of this blog may post a comment.