جدید پنجابی شاعری
اپنے پتر ثناءاللہ توحیدی دی یاد وچ
میرے دل وچ وسن والیا مینوں کر گیوں ریت سراب
مینوں دے کے رج جگراتڑے لے ٹُریوں اکھیوں خواب
میرا پل پل سُولی چاہڑ کے مینوں دے گیوں ہجریں پھاہ
اے کاش کدے تُوں ویخدوں میرا ہویا حال تباہ
میں روناں میریا بچیا! ہر ساہ تے بھر بھر رُگ
میں جگ دے وچ آباد ہاں میرے اندر سارا لُگ
میں اکھ دے اتھرُو گھٹدا میں روک کے رکھی ڈیک
تُوں غم ہے میری رُوح دا جدھے وچ نہ کوئی شریک
تُوں روگ دے وانگوں ہوگیوں میری جان دے وچ بھرپور
تُوں ساہواں دے وچ وس کے وی فیر میرے کولوں دُور
تینوں لے گئی موت کواسڑی بن سایا اک مہیب
میرا ٹُر گیا پھُل گُلاب دا میرے سڑ گئے اینج نصیب
میرا چانن میتھوں رُسیا ہو گئی اے دُور سویرے
اوہدے باہج توحیدی دُنیا جیویں سُورج وچ ہنیر
عبیداللہ توحیدی
No comments:
Post a Comment
Note: only a member of this blog may post a comment.