جدید پنجابی شاعری
اسیں قوم چھیتّر سالڑی اسیں جگ دے وچ نلام
اساں دِتیاں لکھ قربانیاں اسیں فیر وی رہے غلام
ساڈے راکھے قاتل بن گئے اسیں جیوندے لتھ گئے گور
ساڈے لُوں لُوں وچ فریاد ہے اسیں چُپ چپیتے شور
ایتھے بے انصاف عدالتاں ایتھے لیرو لیر قنون
ایتھے قاضی ڈنڈیاں ماردے ایتھے عدلیں ہوندا خون
ساڈے گھل وچ پگاں پے گیاں، بد ذاتاں ہتھ مہار
اسیں دن تے راتیں کُوکدے، ساڈی کوئی نہ لیندا سار
ایتھے اندر قید معصوم نیں بند کیتے انھے زور
سِر ٹھینگے نیں بے دوشیاں ایتھے نچدے پھردے چور
ایتھے پُلساں کندھاں ٹپدیاں ایتھے کرے شرافت وَین
ہر سوچ دے وچ فریاد ہے پر کس نوں جا کے کہین
اسیں یار توحیدی سوچدے رہے شرک دے پلڑے وچ
اسیں جنت اُتلی لبھدے پئے دوزخ تھلڑے وچ
عبیداللہ توحیدی
No comments:
Post a Comment
Note: only a member of this blog may post a comment.