جدید پنجابی شاعری
اج وی پِنڈ دی پِیلی واجاں مارے
مڑ آ چنّا چَھڈ دے شہر دے کھاڑے
بڈھے ماں پیو دیندے نی دوہائی
پُترا تُو جتیا تے اِسی ہارے
کے لبھیا تینوں شہر دیاں ہواوں وچ
بھیڑے طور طریقے تے سزاوں وچ
پوہ تو پہلاں آون دا تیرا وعدہ سی
ٹھر گیئاں چڑیاں آ گئے ہن جاڑے
اج وی پنڈ دی پیلی واجاں مارے
مڑ آ چنا چھڈ دے شہر دے کھاڑے
آندے جاندے لوکی تیرا پُچھدے نے
میرے انج پران وی ہن دُکھدے نے
چن وہ تیریاں خبراں لیندا رہندا اے
تے رہواوں تیریاں تکدے نے تارے
آج وی پنڈ دی پیلی واجاں مارے
مڑ آ چنا چھڈ دے شہر دے کھاڑے
کجھ نہیں لبھنا سالاں بعد جے آوئیں گا
بندے نہیں فر قبراں ہی پاویئں گا
وقت پمبھیری بن کے آکھے گا
لنگھ گیاں عمراں مُک گئے نی او سارے
اج وی پنڈ دی پیلی واجاں مارے
مڑ آ چنا چھڈ دے شہر دے کھاڑے
سہیل صفدر
No comments:
Post a Comment
Note: only a member of this blog may post a comment.