جدید پنجابی شاعری
جنتاں دی چھاں نُوں رب جئے ناں نُوں
دُکھی ہوواں جد میں یاد کراں ماں نُوں
روندا مینوں ویکھ کے اوں لوریاں سناؤندی سی
وار وار مرچاں او چُلھیاں اچ پاندی سی
راتی اُٹھ تکدی سی سون والی تھاں نُوں
دُکھی ہوواں جد میں یاد کراں ماں نُوں
مٹی وچ کھیڈ کے تے لیڑے گندے کر کے
گھر جد آیا نہ میں مار کولوں ڈر کے
پُچھ پُچھ گاہیاں اوہنے سارے ہی گراں نُوں
دُکھی ہوواں جد میں یاد کراں ماں نُوں
گھیرے مینوں پاندیاں سی جیڑے ویلے مرضاں
راتاں اوہ گزاردی سی کر کر عرضاں
ربا تُو شفا دے دے میری ایس جاں نُوں
دُکھی ہوواں جد میں یاد کراں ماں نُوں
دیسوں باہر شوق جد کم لئی میں جاندا ساں
بھُل کے جے کدی چٹھی دیر نال پاندا ساں
پُچھدی سی حال میرا چُوری پا کے کاں نُوں
دُکھی ہوواں جد میں یاد کراں ماں نُوں
اسلم شوق
No comments:
Post a Comment
Note: only a member of this blog may post a comment.