جدید پنجابی نعتیہ شاعری
ککھ وی جھولی وچ آقا دے کرم دے باجھ نہ آوے
اکو ای تھاں ہے جتھوں مینوں منگدیاں لاج نہ آوے
اُچیاں شاناں والے نُوں میں ناں دے نال پکاراں
سچی تانگھ اچ عقل، تمیزاں، رِیت رواج نہ آوے
آقاﷺ دا امت نُوں سانبھ کے رکھن دا وعدہ اے
آپﷺ دا کُھلا در ہووے تے کیوں محتاج نہ آوے
مُہر لگا چھڈی اے رب نے ایہو اول، آخر
بعد محمدﷺ کسے نبی دا جگ تے راج نہ آوے
مِرے نبیؐ نے فاطمہؑ ٹوری نیکی ہتھ پھڑا کے
اک چٹائی، اک مشکیزہ دِھی نال داج نہ آوے
باقی عمر گزاراں آپؐ دے در تے وانگ فقیراں
چُلھے پوے زمانہ جا کے، وِچ سماج نہ آوے
کد چاہواں میں مغروری تے مشہوری رخشندہ
آپؐ دے در دی خاک مِلے، ایس سِر تے تاج نہ آوے
رخشندہ نوید
No comments:
Post a Comment
Note: only a member of this blog may post a comment.