جدید پنجابی شاعری
درد حیاتی دُھپ دے سائے ہائے نی مائے
سر تے بھار ہجر دے چائے ہائے نی مائے
بے گھر بندہ سرد ہوا بے حسی دی
خون رگاں وچ جمدا جائے ہائے نی مائے
کول ہووے اوہدے اگے ہتھ وی جوڑ لیئے
دُور گئے نُوں کون منائے ہائے نی مائے
جگ حمام اچ سارے ننگ پننگے نیں
کون کسے تے پڑدا پائے ہائے نی مائے
خورے تاہنگ اُڈیکاں کیوں نئیں مُکدیاں
آوندے یاد نیں جو نئیں آئے ہائے نی مائے
ساہواں بن کے رہ گئیاں چکر درداں دا
کیہڑا آ کے پیڑ ونڈائے ہائے نی مائے
لگے ہوئے نیں جتھے پیر توحیدی دے
ٹُردے پئے آں اوسے رائے ہائے نی مائے
عبیداللہ توحیدی
No comments:
Post a Comment
Note: only a member of this blog may post a comment.