جدید پنجابی شاعری
ایہہ بے وسیاں اکھیاں رکھیاں دِیداں دی ترہائیاں میں
سائیا! بدل ٹال غماں دے پِیڑاں سُکنے پائیاں میں
فیر وی سلھی یاد کسے دی کلّر چھڈنوں نئیں رہندی
جگراتے دیاں دھوخنیاں تے اکھاں روز دُھخائیاں میں
ہڈاں بال کے چانن کیتے میں سپّاں دیاں بمبیاں وچ
جیبھاں اُتے ناگ لڑائے ریجھاں انج پرنائیاں میں
رتی رُت دا ماسا کو وی بھار نہ جھلیا جُثے نے
رتیاں انج سرسائیاں کر کے سائیاں نوں پرتائیاں میں
عملی رملی آل دوالے گھیرا پائی رکھدے نیں
جُھگے ساڑے لِیڑے پاڑے، جھلیاں سب رُسوائیاں میں
جی کردائے وردھے مینہہ وچ چھپ چھپ کردا ٹُریا جاں
پر چپلی دا کیہ بھرواسا، ودھراں ہُنے پوائیاں میں
رانا سعید دوشی
No comments:
Post a Comment
Note: only a member of this blog may post a comment.