جدید پنجابی شاعری
ماں ای دے دے تھوڑی جِنی
آپ تے ٹُر گئی ایں نی مائے
مینوں پینڈے اوکھے آئے
ایڈی چھیتی جانا سی جے
مُڑ واپس نئیں آنا سی تے
راہواں ساریاں دس کے جاندی
میں ناں تھاں تھاں ٹھیڈے کھاندی
لاڈ پیار دی پکھ سی جیہڑی
اوہ تے پوری کر کے جاندی
رِیجھاں سدھراں ناچ نچائے
اک اک پیر تے دِسدے پھائے
تیرے ورگا ساتھ ناں کوئی
اکھ وی روندی چُپ نہ ہوئی
تیرے مغروں بدل گیا سب
کدے کدے تے انج وی لگیا
جیویں میرا بدل گیا رب
تُوں تے جنت ٹُر گئی اے ماں
میری جِندڑی رُل گئی اے ماں
ربا! اپنی جنت اندر
میرے لئی کوئی ماڑی موٹی
ماں میری دے لاگے کر کے
تھاں ای دے دے تھوڑی جِنی
میں کجھ ہور ناں منگدی تیتھوں
ماں ای دے دے تھوڑی جِنی
ماوٰی سلطان
No comments:
Post a Comment
Note: only a member of this blog may post a comment.