جدید پنجابی شاعری
شاہ حسین توں معذرت دے نال
اُٹھ شاہ حسینا ویکھ لے
ساڈی بجلی گئی اے بُجھ
سانوں کنداں ٹکراں وجدیاں
ساڈی بُوتھی گئی اے سُجھ
اُٹھ شاہ حسینا ویکھ
ساڈی وجی گئی اے مت
کوئی کُبا لب کے دیو سانُوں
جیہڑا دیوے سانوں لت
اُٹھ شاہ حسینا ویکھ لے
سانُوں ظالماں دِتا رول
ساڈے گیس دے چُہلے بُجھ گے
ساڈی گڈی نہیں پٹرول
اُٹھ شاہ حسینا سوہنڑیاں
جے لک وچ ہووی ساہ
ساڈے نال اُٹھ کے کورس وِچ
تُوں بالو بتیاں گا
اُٹھ شاہ حسینا ویکھ لے
ساڈے کھیتاں وڑ گئے سُور
اسی وریاں توں پہۓ چلدے
ساڈی فیر وی منزل دُور
اُٹھ شاہ حسینا ویکھ لے
آئی جد توں فیس دی بُک
ساڈے بچے انّے ہو گئے
نالے نکلی سب دی چُک
اُٹھ شاہ حسینا ویکھ لے
اِتھے گوبر لگیا ٹیکس
نہیں لیندیاں مُنہ توں کالخاں
اسی مل مل تھکے لیکس
اُٹھ شاہ حسینا سُتیا
چُک مُنہ دے اُتوں لحاف
اسی ہتھ بن عرضاں کردے
ساڈی بُھل چُک کر دے معاف
اُٹھ شاہ حسینا ویکھ لے
اسی ہو گئے اج ذلیل
اسی فِرقہ فِرقہ ہو گئے
سانُوں کُٹدا اسرائیل
شکیل اعوان
No comments:
Post a Comment
Note: only a member of this blog may post a comment.