جدید پنجابی شاعری
زہر پیالے دے وِچ امرت گھولاں گا
میں جابر سلطان دے اگے بولاں گا
آپنا جے کر تخت ہزارا چھڈیا اے
پیراں ہیٹھ میں جھنگ سیال مدھولاں گا
میں دِھیدو نُوں مان ہے آپنی ونجھلی تے
آپنی جٹی ہِیر دے من نُوں موہ لاں گا
بن کے وانگ کتاب میرے ہتھ لگا اے
ہُن میں اوہدا ورقہ ورقہ پھولاں گا
آپنے ہتھیں آپنی موت لیاواں گا
آپنے ہتھیں اوہدیاں زُلفاں کھولھاں گا
آخر بیلے وچ چرائیاں مجھاں نے
کالی بُوری جو وی لبھی چوء لاں گا
میں تے آپنا لال سنبھالی رکھیا اے
میں کاہدے لئی ارشد راکھ پھرولاں گا
حکیم ارشد شہزاد
No comments:
Post a Comment
Note: only a member of this blog may post a comment.