جدید پنجابی شاعری پنچھی تے پردیسی
مینوں اج ٹُر گیا زمانہ ڈاہڈا یادیں آوے
شالا رب دوبارہ اس نوں واپس موڑ لیاوے
ہانڑی پھانڑی سبھو رل کے کھیڈن نال خوشی دے
دل پرچاون سوہلے گاون ہر ہک نوں چس آوے
تھوڑے بہت سکولے جاون بہتے رہن گھراں وچ
کج پئے مال مویشی چارن ماں پیاں ہتھ وٹاوے
پانی بھرن کھوآں نوں جاون ناراں تے مٹیاراں
دو دو گھڑے سراں تے چاون لک لٹکے پیا کھاوے
جے ایہ گلاں سناون لگاں گل نہ مکدی نیڑے
اگے چل ہے لمی منزل سجن پار بلاوے
تینوں میں او یاد کراواں گل اوہ پنچھی والی
لمی مار اڈاری اُڈے کدوں پرت کے آوے
سن کہانی اس پنچھی دی اُڈ گیا آہلنا چھڈ کے
دور وطن تھیں او جا پہتا جو پردیس کہاوے
اڈ اڈ جدوں نسدا ہویا لتھا دور ملک وچ
نویں نویں سب پنچھی ویکھے اپنا نظر نہ آوے
رنگ برنگی خلقت دِسے کُج کالے کُج گورے
کنک رنگے وی کافی سارے کج نڈھے کج باوے
کاں وی اُتھے گورے گورے اپنی ٹوراں ٹُردے
ڈاکو وانگر چیزاں لُٹدے جو کُجھ سامنے آوے
پردیسی نوں رلن نہ دیندے مارن ٹھونگاں چونگاں
پھر بھلکے ہی یار بناون جے کوئی اُنہاں کھلاوے
اپنے باغ بغیچے چھڈے کیوں ہویا پردیسی
یاداں کر فریاداں کردے تلخی جان ستاوے
آ سجناں اُڈ چلیے ایتھوں لمی مار اُڈاری
اس جائی ہن کاہنوں رہنا منوں کجھ نہ بھاوے
چل سجناں ہن کر تیاری چھیتی مار اڈاری
خویش قبیلہ سارا کر دے ہک اللہ نے حوالے
عاجز بن کے رہو توں بندیا نہ کر چتر چالاکی
بندے کدی نہ بندے پنچھی واہ تیری بے باکی
محمد یوسف عاجز
No comments:
Post a Comment
Note: only a member of this blog may post a comment.