جدید پنجابی شاعری
لنگھے وقت دے یار خسارے نئیں جاندے
پانیاں وِچوں گھیؤ نتارے نئیں جاندے
ڈُبن لگیاں دَسیا سی گہرائیاں نے
دریاواں وِچکار کنارے نئیں جاندے
مُکھ دا عکس وکھا کے چن تے ٹُر جاندے
یاداں دے کُج یار ستارے نئیں جاندے
میں وی ڈٹ کے کوشش کیتی بُھلن دی
میتھوں وی کُج لوگ وِسارے نئیں جاندے
اجے وی مِلدا اے کدی تے اکھ مِلا لیندا اے
اجے وی اوہدی آکھ چوں لارے نئیں جاندے
ایویں ای لوکاں پتھر مارے مجنوں نُوں
عشق دے مارے لوگ تے مارے نئیں جاندے
عرفان وارث
No comments:
Post a Comment
Note: only a member of this blog may post a comment.