دِسن لگ پئے نفرت دے آثار وی ہولی ہولی
کُھس جاوے گا دھرتی کولوں پیار وی ہولی ہولی
کوئی نہ جانے کل نُوں بندے کیہ کج بن جاون گے
بدل رہے نیں ذہناں نُوں اخبار وی ہولی ہولی
میں تے اپنا دُکھ کِسے نُوں حالی تیک نہیں دسیا
اج دیاں لوکاں احساساں تے ایسیاں مُہراں لائیاں
بے حِس ہُندے جاندے نیں فنکار وی ہولی ہولی
اِس دھرتی نے کیہڑی شے اج کھوہ لئی ساڈے کولوں
اپنی ذات تُوں اُٹھدا جائے اِتبار وی ہولی ہولی
اکلاپے نُوں سینے لا کے سدھراں سُولی چڑھِیاں
دل نگری دے اُجڑ گئے بازار وی ہولی ہولی
ویکھ ویکھ کے آل دوالے ٹُردِیاں پھردِیاں لاشاں
مردے جاندے خلشؔ جیہے فنکار وی ہولی ہولی
طفیل خلش
