میڈا عشق وی توں میڈا یار وی توں
میڈا دِین وی توں ایمان وی توں
میڈا جسم وی توں میڈا روح وی توں
میڈا قلب وی توں، جند جان وی توں
میڈا کعبہ قبلہ مسجد ممبر مُصحف تے قرآن وی توں
میڈا ذکر وی توں، میڈا فکر وی توں، میڈا ذوق وی توں وجدان وی توں
میڈا سانول مٹھڑا شام سلونڑا من موہن جانان وی توں
میڈا مرشد ہادی پیر طریقت شیخ حقائق دان وی توں
میڈی آس امید تے کھٹیا وٹیا تکیہ مانڑ تے ترانڑ وی توں
میڈا دھرم وی توں میڈا بھرم وی توں میڈی شرم وی توں مینڈی شان وی توں
میڈا ڈُکھ سُکھ رووَنڑ کھلنڑ وی توں میڈا درد وی توں درمان وی توں
میڈا خوشیاں دا اسباب وی توں، میڈے سولاں دا سامان وی توں
میڈا حُسن تے بھاگ سُہاگ وی توں میڈا بخت تے نام و نشان وی توں
میڈا ڈیکھنڑ بھالنڑ جاچنڑ جوچنڑ، سمجھنڑ جانڑ سُنجانڑ وی توں
میڈے تھدڑے ساہ تے مونجھ مُنجھاری ہنجنڑوں دے طوفان وی توں
میڈے تلک تلوے سیندھاں مانگھاں ناز نہورے تان وی توں
میڈی مہندی کجل مُساگ وی توں، میڈی سُرخی بیڑا پان وی توں
میڈی وحشت جوش جنون وی توں، میڈا گِریہ آہ و فغان وی توں
میڈا شعر عروض قوالی وی توں، مینڈا بحر وی توں اوذان وی توں
میڈا اول آخر اندر باہر، ظاہر تے پنہاں وی توں
میڈا فردا تے دیرزوی وی توں، الیوم وی توں الان وی توں
میڈا بادل برکھا، کھمڑیاں گاجاں بارش تے باران وی توں
میڈا ملک ملیر تے مارو تھلڑا روہی چولستان وی توں
جے یار فریدؔ قبول کرے سرکار وی توں سلطان وی توں
نہ تاں کہترا کمترا حقر ادنیٰ، لاشئے لا امکان وی توں
خواجہ غلام فرید کوریجہ
No comments:
Post a Comment
Note: only a member of this blog may post a comment.