چھوڑ او بھائیا
سانُوں ساڈے حال تے چَھڈ دے
ایہہ کِیہ مَتّاں دَیناں ایں تُوں
دِین دُنی دے رولے گولے
بھائیا تینُوں ہون مُبارک
دِین دُنی دے رولے گولے
اوہنُوں پَھبدے
جِہدے ویہڑے خُوشیاں نَچّن
جِہدے دِن دا پَل پَل بھائیا
اپنے یار دے پیار چ لنگھے
جِہدی رات سَجّن نال کھیڈے
دِین دُنی دے رولے گولے
اوہنوں پَھبدے
جیہڑا بندا جیُوندا ہووے
چھوڑ او بھائیا
سانُوں ساڈے حال تے چَھڈ دے
اَسّی تاں جِیویں لاش جیہے آن
مُردے لئی تاں
دُنیاداری
فرض فرِیضے
رولے گولے
ہر شے مٹّی
چھوڑ او بھائیا
لاشاں اُتّے
حُکم شریعت
کُجھ نئیں چَلدا
میر تنہا یوسفی
