جانا اوہناں ول کدی اویر آپے، کدی جان کے آپ سویر جانا
جانا جا کے سوچنا پرت آؤنا، پچھانہہ پرت کے سوچنا، پھیر جانا
کول ہُندیاں اوہناں ول جان دے لئی موڑاں مُڑی جانا وَلے پائی جانا
اساں جدوں وی اوہناں دے ول جانا راہواں نال کر کے ہیر پھیر جانا
ہوندے رہن دو پاسیوں صلح دے لئی حیلے خوب بنوٹیاں روسیاں دے
ساڈا اوہناں وَل ویکھنا چور نظرے، لنگھ اوہناں دا بلھ اٹیر جانا
ویکھے حسن دے درس وچ بڑی واری لفظ بدل جاندے سنے معنیاں دے
لباں ہلدیاں زبر دا زیر ہونا، نظراں نال ہو زبر دا زیر جانا
چڑھتل بدلدے سمیاں دے موڈھیاں تے چڑھدی رہی اے واریاں دی
دھرنے سوہنیاں نے جھتے پیر اوتھے لا عاشقاں سراں دے ڈھیر جانا
ڈاکٹر فقیر محمد فقیر
