کتاب الوجود الموجود
ایہہ تے وحدت وجود کتاب کھُلی، داستان بھی اے، اسرار بھی اے
حرف حرف اے کان معانیاں دی سطر سطر منشی معنی دار بھی اے
مصر شہر بھی اے شارستان بھی اے باغِ ارم بھی اے بلبلِ زار بھی اے
ہر ہر رنگ جناب کتاب، اندر نیکی بدی، جبر و اختیار بھی اے
ایتھے مار بھی اے نالے پیار بھی اے ایتھے جِت بھی اے نالے ہار بھی اے
سفر سیف الملوک دے عشق دا اے، شاہ پری دا حُسن دربار بھی اے
موجِ لہر بھی اے غضبِ قہر بھی اے بیڑا غرق بھی اے بیڑا پار بھی اے
صبح شام بھی اے دن رات بھی اے کالی زلف تے لال رخسار بھی اے
گوہر سنگ بھی اے صلح جنگ بھی اے نغمۂ چنگ نالۂ اشکبار بھی اے
ویری سرے دا یار دا یار بھی اے بستی شہر بھی اے جنگل بار بھی اے
ذکر میل ملاپ تے وصل دے نیں دُکھ درد تے حال پکار بھی اے
خوشی کھیڈ ہاسے نالے رون پِٹن تتی خزاں تے سماں بہار بھی اے
ڈبن ترن جیون مرن بھرن ویٹن باد خاک بھی اے آب نار بھی اے
ظلم جبر تے عدل انصاف بھی اے دل مطمئن بے قرار بھی اے
دانش عقل سودا جنون بھی اے منبر شرع دا عشق دا دار بھی اے
اون مِنّی بھی اے لَن ترٰانی بھی اے پردہ پوشیاں درس دیدار بھی اے
سُکھ چین اس وچ غم دے وین اس وچ راہی پا پیادہ شاہ سوار بھی اے
پریاں جن انسان تے مَلک حوراں کالے دیواں دا شور شکار بھی اے
ایتھے تخت شاہی نالے موت تختہ منگن ہار بھی اے دیون ہار بھی اے
سورج چن بروج افلاک دھرتی مَن لین بھی اے انکار بھی اے
حال قال بھی اے پتھر لال بھی اے نور و نور اندھیر غبار بھی اے
ذکر ٹَلیاں تختیاں بیڑیاں دے کوہستان ویران گلزار بھی اے
پچھلی رات بھی اے تے قطار بھی اے ساربان دے ہتھ مہار بھی اے
جاگن سون بیٹھن اٹھن ہیٹھاں اتاں اگے پچھے دا ذکر اذکار بھی اے
جل تھل ندی نالے مگرمچھ مارُو ایتھے جال بھی اے شکار بھی اے
ہین راز مجاز حقیقتاں دے کوہج سوہج تے نقش نگار بھی اے
ایتھے ذات بھی اے تے صفات بھی اے شبہ شک بھی اے اعتبار بھی اے
کر لے اپنے آپ دی سیر دائمؔ، تیرا دل ہی تیرا دلدار بھی اے
دائم اقبال دائم
