ذرا ذرا زمین دا تھر تھرایا
حضرت ہوئے حکم تے کجھ وکھا دیواں
اک پل اندر ایناں ظالماں نوں
ذرے ذرے دے وانگ اڈا دیواں
آسمان آکھے اکوں کڑک ماراں
کُل نام و نشان مٹا دیواں
قدم بوس ہو کرے ہوا عرضاں
تختہ بستی دی ہوا دا چا دیواں
آتش کہے جے سوہنیا لب کھولیں
بُھن دشمناں ساڑ جلا دیواں
پانی آکھدا جوش دی لہر اندر
روہڑ ڈوب پاتال لنگا دیواں
وٹے آپ تاہیں مارن والیاں تے
بدل آکھدا گڑھا وسا دیواں
ہوندے کون ظالم جہیڑے ماردے نیں
جان جندڑی گول گما دیواں
سورج آکھدا کہو تے کڈھ اکھاں
اہلِ طائف اں لانبو لا دیواں
رات آکھے آفات بلاں چھڈاں
رات ماتمی سوہنیا پا دیواں
سوہنے آکھیا بس نہ لوڑ کوئی
صبروں اپنا فرض نبھا دیواں
میں تے سب دے واسطے بھلا منگاں
بد دعا کیوں مونہہ ہلا دیواں
مخلوقات ایہہ میرے خدا دی اے
ہو کے رحمت کیوں رنج ایذا دیواں
دائؔم جناں مارے پتھر بھلا ہوئے
طائف والیاں پیا دعا دیواں
دائم اقبال دائم
