گیت
پہلی واری اج اوہناں اکھیاں نے تکیا
ایہو جئیا تکیا کہ ہائے مار سٹیا
پہلی واری اج اوہناں اکھیاں نے تکیا
پہلی واری اج اوہناں
ازلاں توں دل میرا تیرا ای دیوانہ سی
تیرے باہجوں میرے لئی ایہہ دنیا ویرانہ سی
مل گئی توں سُنجا ویہڑہ سدھراں دا وسیا
ایہو جئیا تکیا کہ ہائے مار سٹیا
پہلی واری اج اوہناں
چُنی دا ایہہ پلا ذرا بُلہیاں چہ لے کے
چوٹھی موٹھی ایویں کسی سوچ وچ پے کے
ہنس دے او ہاسہ جیہڑا زورا زوری ڈکیا
ایہو جئیا تکیا کہ ہائے مار سٹیا
پہلی واری اج اوہناں
سونہہ تیری جدوں وی میں گیت کوئی کہنا واں
بحر اوہدی تیری سوہنی ٹور کولوں لینا واں
شاعری دا نواں ڈھنگ تُوئیوں مینوں دسیا
ایہو جئیا تکیا کہ ہائے مار سٹیا
پہلی واری اج اوہناں
پلکاں دے سہرے تِکھے نیناں اُتے پا کے
اک واری ویکھ مینوں فیر شرما کے
بھلدا نئیں مزہ تیری دید والا چکھیا
ایہو جیا تکیا کہ ہائے مار سٹیا
پہلی واری اج اوہناں اکھیاں نے تکیا
وارث لدھیانوی
No comments:
Post a Comment
Note: only a member of this blog may post a comment.