دل دیاں گلّاں دسدا دسدا
رو پیندا واں ہسدا ہسدا
اجے تک اے پتا نئیں لگیا
اُجڑ گیا کیوں وسدا وسدا
اے حیاتی لمّے پینڈے
تھک گیا واں نسدا نسدا
زندگی دی ایہ ٹِہلّی منجھی
مر گیا واں کسدا کسدا
عشق دا بدّل میرے ُاتّے
رک گیا اے وسدا وسدا
اک دوجے توں وچھڑ گئے
میں روندا، او ہسدا ہسدا
کیہڑی گل لکاؤنی پے گئی
چپ ہویا کیوں دسدا دسدا
موت آی تے چانن ہویا
نکل گیا واں پھسدا پھسدا
عامر شہزاد تشنہ
No comments:
Post a Comment
Note: only a member of this blog may post a comment.