راتیں کُجھ چِر کلیاں بہ کے
اپنے آپ دے نال مِلن دا موقع مِلیا
کِنیاں ای گلاں باتاں ہویاں
دُکھ سُکھ پھولے
او گلاں جو ڈر دے مارے کر نہیں سکدے
او شاعری جو ڈر دے مارے پڑھ نہیں سکدے
او غزلاں جو ڈر دے مارے گا نہیں سکدے
قسمے اپنے سامنے بہ کے
سب کُجھ پڑھیا
سَب کُجھ گایا
رج کے رانجھا راضی کیتا
آپے ای اپنا من پرچا کے گلیں باتیں
دل توں بھار دے کِنے ای پتھر لَتھ گئے راتیں
راتیں کُجھ چِر کلیاں بہ کے
وقت لنگھایا خوش خوش رہ کے
حکیم احمد نعیم ارشد
No comments:
Post a Comment
Note: only a member of this blog may post a comment.