پنجابی نعتیہ کلام
جس بشر دے ناں دا چرچا ویکھاں میں وچ نوریاں
مینوں وی جے اوہ بلاوے ہون آساں پوریاں
مانگ اپنی نوں سجاوے چن وی تیرے نور توں
مہک تیرے گیسوواں توں بھر دیاں کستُوریاں
تُوں کرم دی جھات اِک پاویں جے میرے حال تے
ایہہ مِرا ایمان ہے مُک جان سب مجبوریاں
رحمتاں والی تُوںﷺ کملی وچ لُکایا اے ہمیش
جد وی دنیا دے میں متّھے ویکھیاں نے گُھوریاں
ایہو جئے بھاگاں بھرے نوں فیر ڈک سکدا اے کون
جس دیاں تیریﷺ جنابوں آوندیاں منظوریاں
ہو گیا جیہڑا تیریﷺ ختمِ نبوتﷺ تے شہید
حُوراں جنت وِچ کھواون کیوں نہ کُٹ کُٹ چُوریاں
ماں پیو، بہناں بھراواں، دِھیاں پُتراں دی قسم
تُوںِ بلاویں کول جے، منظور سب تُوںؐ دوریاں
جانڑدا سی کون ایس جگ تے بھلا گیلانی نوں
تیریاںؐ نعتاں دے صدقے ہویاں مشہوریاں
سلمان گیلانی
No comments:
Post a Comment
Note: only a member of this blog may post a comment.