پنجابی نعتیہ کلام
طٰہٰ دی شان والیا
عرشاں تے جان والیا
کِڈا سوہنا نام تیرا
اُچا اے مقام تیرا
سچا اے کلام تیرا
آیتاں سُنان والیا
طٰہٰ دی شان والیا
عرشاں تے جان والیا
شان تیری بلے بلے
رب وی درود گھلے
وَیریاں دے پیراں تھلے
چادراں وِچھون والیا
طٰہٰ دی شان والیا
عرشاں تے جان والیا
تذکرے نے عام تیرے
ہوندے صبح و شام تیرے
بادشاہ غلام تیرے
قسمتاں جگاؤن والیا
طٰہ دی شان والیا
عرشاں تے جان والیا
سَداں بے سہاریاں نوں
غماں دیاں ماریاں نوں
ماڑیاں بےچاریاں نوں
سینے نال لان والیا
طٰہٰ دی شان والیا
عرشاں تے جان والیا
دل دی آس پوری ہوئی
دُور تیری دُوری ہوئی
حاضری ظہوری ہوئی
روضے تے بُلان والیا
طٰہٰ دی شان والیا
عرشاں تے جان والیا
محمد علی ظہوری
No comments:
Post a Comment
Note: only a member of this blog may post a comment.