پنجابی نعتیہ کلام
میں لجپالاں دے لڑ لگیاں مِرے توں غم پرے رہندے
مِری آساں اُمیداں دے سدا بُوٹے ہرے رہندے
خیال یار دے وچ میں مست رہندا ہاں دِنے راتیں
مِرے دل وِچ سجن وَسدا، مِرے دِیدے ٹھرّے رہندے
دعا منگیا کرو سنگیو! کِتے مُرشد نہ رُس جاوے
جنہاں دے پِیر رُس جاون اوہ جیوندے ای مَرے رہندے
ایہہ پینڈا عشق دا اوکھا، ایہہ ٹُرنے نال ای مُکناں اے
اوہ منزل نوں نئیں پا سکدے جہڑے بیھٹے گھرے رہندے
کدی وی لوڑ نئیں پیندی مینوں در در تے جاون دی
میں لجپالاں دا منگتا ہاں، مِرے پَلے بھرے رہندے
نیازی! مینوں غم کاہدا،۔ ایہہ میری نسبت ہے سلطانی
کسے دے رہن جو بن کے قسم رب دی کھرے رہندے
عبدالستار نیازی
No comments:
Post a Comment
Note: only a member of this blog may post a comment.