پنجابی نعتیہ عارفانہ کلام
آ گئے بن کے رحمت نبی مصطفٰیؐ
دور سارے زمانے داغم ہو گیا
عرشیاں فرشیاں کیتے سجدے ادا
ساری اُمت تے رب دا کرم ہو گیا
نور والے دے انوار بکھرے جدوں
ساڈے وگڑے مقدر سنور گئے اودوں
دیکھ کے چہرۂ والضحٰی آپؐ دا
دِیوا ظلم و ستم دے مدھم ہو گیا
حرمِ کعبہ نُوں قُدسی سجاون پئے
سہرے سوہنے محمدؐ دے گاون پئے
کر کے سجدے نبیؐ دے ثنا خواناں وِچ
اج تے شامل خدا دا حرم ہو گیا
اے حلیمہ ہے چمکی تیری جھونپڑی
تیرے بُوہے تے اللہ دی رحمتؐ کھڑی
تیرا چھپّر کھجوری خدا دی قسم
سوہناﷺ آیا تے باغِ ارم ہو گیا
اوہدے آئیاں نبوّت دی گل بن گئی
اوہدے آئیاں شرافت دا مل پے گیا
باغ ایمان دا سہکدا سی پیا
آپؐ آئے تے اوہ تازہ دم ہو گیا
مِرے مشکل کشا میرے حاجت روا
مصطفٰیؐ مصطفٰیؐ مصطفٰیؐ مصطفٰیؐ
میں جدوں نام سوہنے نبیﷺ دا لیا
میرا اوکھے توں اوکھا وی کم ہو گیا
کافراں نُوں وی ایماں دی دولت ملی
کئی ناصرغریباں نوں عزت ملی
میرے سوہنے محمدؐ دے دربار وِچ
پتھراں دا وی لہجہ نرم ہو گیا
ناصر چشتی
No comments:
Post a Comment
Note: only a member of this blog may post a comment.