پنجابی نعتیہ عارفانہ کلام
نرالے محمدﷺ دا در وی نرالا
بُلاوے اوہؐ بُوہے تے ہر اک نوں شالا
محمدﷺ دے در دی ملے جے گدائی
ایہو جی زمانے چ نعمت نہ کائی
اوتھوں جا کے بھردا اے آساں دا پیالہ
قبر وِچ جدوں آ کے پُچھیا نکیراں
میں فٹ بولیا مصطفٰیﷺ دا فقیر آں
مِرے آ گیا کم ایہو ای حوالہ
خدا نوں مِلن مصطفٰیؐ جے نہ جاندے
جے اوہؐ نُوری تلیاں عرش تے نہ لاندے
نہ ہوندی کدی شان اوس دی دوبالا
جے والی نہ اوہؐ بد نصیباں دے بنڑدے
نہ کم اس جہان چ غریباں دے بنڑدے
تے کھوہ لیندے منہ دا وی ظالم نوالا
مدینے دی مٹی خدا نوں وی بھاوے
اوہنوں جا کے ناصر وی اکھیاں چ پاوے
مدینے دی مٹی ہے جنت توں اعلیٰ
ناصر چشتی
No comments:
Post a Comment
Note: only a member of this blog may post a comment.