پنجابی نعتیہ عارفانہ کلام
قدرت دا شاہکار مدینہ
شہراں دا سردار مدینہ
جیہڑا منگتا پاک نبیؐ دا
اس منگتے دا یار مدینہ
جس دا منہ طیبہ ول رہندا
اوہنوں دیندا تار مدینہ
محشر تک آرام کرن لئی
چُنیا اے سرکارﷺ مدینہ
جنت نانویں لگ جاندی اے
وہندے جد گنہ کار مدینہ
میرا نبیؐ اے پھل رحمت دا
اس پھل دی مہکار مدینہ
سارے منگتے اوس گلی دے
سب دا پالنہار مدینہ
پھر جو چاہیں کہندا رہیں توں
دیکھ تے سہی اک وار مدینہ
جس دے وچ خزاں نہیں شامل
ہے اور خاص بہار مدینہ
جنہوں مرض نہ چھوڑے ناصر
دیکھے اوہ بیمار مدینہ
ناصر چشتی
No comments:
Post a Comment
Note: only a member of this blog may post a comment.