اک دوجے لئی ٹھنڈیاں چھاواں ورگے نیں
او جنہاں دے دل دریاواں ورگے نیں
ناز تے نخرے شوخ ہواواں ورگے نیں
اک کُڑی دے وال گھٹاواں ورگے نیں
ہس نہ ہسیاں سو سو فتوے لگدے نیں
ایتھے ہاسے سخت گناہواں ورگے نیں
نہ بئی عشقا ڈر لگدا اے تیرے توں
بھائیا تیرے روگ بلاواں ورگے نیں
ماڑے گھر وچ خُشی وی مرگاں ورگی اے
تگڑے گھر وچ سوگ ویاہواں ورگے نیں
جیون دُھپاں وِچ جے بندا سمجھے تاں
ہُندے چنگے یار وی چھاواں ورگے نیں
سبھ کجھ سر تے رکھیاں ای مل جاندا اے
میری ماں دے ہتھ دعاواں ورگے نیں
توں ماڑے دی کیس خطا نوں رونا ایں
ایہ کڑمے تے آپ خطاواں ورگے نیں
ارشاد سندھو
No comments:
Post a Comment
Note: only a member of this blog may post a comment.