اک روٹی
رُوح جُثے دی جوٹی پِچھے
دو ویلے دی روٹی پِچھے
صبح توں لے کے شاماں تِیکر
محنت دے میں بھنے ٹھِیکر
سڑکاں اُتے روڑی کُٹی
سدھراں دی نکسیری پھُٹی
پُچھ نہ میتھوں کیہ کیہ کیتا
ہر بندے نوں جی جی کیتا
وَن سوَنّے دُکھڑے سہہ کے
ٹھیکیدار توں جھِڑکاں لے کے
اونتر جانے سیک دی چَبی
مینوں فِر اک روٹی لَبھی
میں اوہ روٹی کھاون لگّا
بھُکھاں نوں ورچاون لگّا
آ کُتے نے پُوش ہلائی
ادّھی روٹی اوہنوں پائی
حالی نئیں سی بُرکی توڑی
لیکھاں سانجھ کِسے دی جوڑی
باہر فقیر نے الکھ جگائی
سدا سُکھالی وسّیں بھائی
چمکن چن ستارے تیرے
وسدے رہن دوارے تیرے
سوچ دے شوہ وچ ڈُب گیا میں
ایسے گل وچ کھُب گیا میں
در تے آیا اک سوالی
ایہہ نہ ہووے مُڑ جائے خالی
خود غرضی دی سوچ نوں جھِڑکاں
دے کے من دی لوچ نوں جھِڑکاں
باہر گیا میں چھیتی کر کے
ادّھی روٹی کاسے دھر کے
فیر پِچھاں دی بنّھی تاری
پِچھوں واج فقیر نے ماری
سخیا! تینوں جان گیا واں
تیری بُھکھ پچھان گیا واں
آ، اِنج سانجھ ودھا لینے آں
چَپّہ چَپّہ کھا لینے آں
اُنج تاں مینوں لوڑ نئیں کوئی
رِزق دی مینوں تھوڑ نئیں کوئی
کُلہّم سبب آں میں
ایس لئی کہ رَب آں میں
شبیر نازش
No comments:
Post a Comment
Note: only a member of this blog may post a comment.