ڈکھ دا سارا ملبہ اپنے اندر چاتی وداں
اکھیں دے وچ تار مُتار سمندر چاتی ودا
ٻالیں دی بُکھ میٹن لئ ہر چوک تماشے لینداں
سائیکل اُتے بالیں دی جاہ باندر چاتی وداں
نکھڑی ہاویں سچے ویلے شیدنڑ کھیڈ ءچ سینگی
اجاں تونڑی شیدنڑ آلے پتھر چاتی وداں
ہنڑ تاں وستی آلے سارے صدقے گھولے تھیندن
ڈرائیور بنڑ تے گاڈی اتے افسر چاتی وداں
ہک واری میں یار کوں سگرٹ پیندا ڈٹھا ہامی
ہوں ڈیہنوار دا اپنڑے ہتھ وچ لائٹر چاتی وداں
میڈیا والو آوو میڈے فوٹو چھِکو جلدی
ونڈن کیتے راشن آلے شاپر چاتی وداں
مونجھے من دی خوشی سانگیں ڈیکھ عدیل پتافی
فون اچ تیڈی شادی آلی جھُمر چاتی وداں
عدیل آصف پتافی
No comments:
Post a Comment
Note: only a member of this blog may post a comment.