پنجابی سرائیکی شاعری
ایں وار سانول کیا ڈساں تھل دا سفر کینویں لگے
ساول دی جُھل سرمی دے پُھل تتلیں دے پر کینویں لگے
چھولے تھلاں دے چھالڑے لُرکیاں تے مُرکیاں والڑے
سِتریے تے چِتریے ٹِیلڑے ٹِبیاں تیں گھر کینویں لگے
جو وی نگاہ وچ آ گیا او تاں پناہ وچ آ گیا
کیا کئی نظر آوے اونکوں کہیں دی نظر کینویں لگے
کئی اکھ لگی کہیں خیال وچ رہ گئی لگی کہیں بھال وچ
بُھل کے وی ول اکھ نئیں لگی لگ پئی مگر کینویں لگے
جو ہے خیر دی کھیڈ ہے خبراں وی ہِن قبراں وی ہِن
جو بے خبر ہے خود کنوں اوندی خبر کینویں لگے
ساہ ساہ کوں سِک سوئیاں لگیاں لوں لوں وچوں لوئیاں لگیاں
جنگل تے جھر شہریں دے شر کہیں شئے دا ڈر کینویں لگے
کیا کیا ڈساں کینویں ڈساں توں کئی ڈسن دی شئے تاں نئیں
گُل پُھل تھلاں دی چاندنی، پچھلا پہر کینویں لگے
عزیز شاہد
No comments:
Post a Comment
Note: only a member of this blog may post a comment.