پنجابی ہندکو شاعری
بارہ ماہ باقی صدیقی سٹائل اچ
چیتر چت نہ لگے کہار
کدھر مینڈی گئی بہار
اوسے نال لبھیا وساکھ
جس نیں ویہڑے پُٹھی داکھ
دُھپیں دُھپیں آیا جیٹھ
سدھراں کھادے سو سو ویٹھ
سڑنا بلنا آیا ہاڑھ
چکا جیہی رات دہاڑھ
ساون آیا خیالی چُوڑ
مُونہے اٹے اُڈے تُوڑ
بھادوں سٹے تتی وہاڑ
اپنی رَت کڑاہی چاہڑ
اسیوں نساں کیہڑے راہ
گڈیاں گل پٹولے بھاہ
کَتے بیٹھی چرخہ ڈاہ
چُبھے ہتھاں وچ کپاہ
مگھر دسے کالی رات
دِیوے وچ نہ تیل نہ بات
آیا پوہ سین ایناں روہ
کسے نہ لائی تینڈی جوہ
مانہے نال دل ٹھنڈا ٹھار
دو قدماں تے تینڈا گھار
پھگن جُھلے ٹھنڈی وا
کالی رات نہ دیوے راہ
باقی صدیقی
No comments:
Post a Comment
Note: only a member of this blog may post a comment.