امن دے شیشے دا پرچھاواں، اُلفت دی مہکار وی آں
میں ویلے دی تختی دا منہ متھا، نقش نہار وی آں
کل وی میں ساں، اج وی میں آں، آون والا کل وی میں
سودا میرے نال مُکا لؤ، وختاں دا بازار وی آں
لُکن مِیٹی تے ہٹ دھرمی، ہن میں کھیڈن دینی نئیں
میں ظُلماں دی نگری دے وِچ، امن دا اک اوتار وی آں
اس دُنیا دے محل منارے، باغ بغیچے میرے لئی
دُکھ وی میرے، سُکھ وی میرے، امناں دا کردار وی آں
اگ دے وِچ وی میں کُدیا ساں، دھون تے چُھری پھرائی سی
نیزے تے سر میں ای دھریا، جنت دا سردار وی آں
سُولی تے وی میں ہی چَڑھیا، اپنی کھل وی آپ ہی لُہاہی
جہڑا لتھ کے وی نہ جُھکیا، اس سر دی دستار وی آں
اس دنیا وِچ پہلا واسی، وی آزاد تے میں ہی ہاں
عرش تے اج وی جسدا چرچہ، میں اوہو معمار وی آں
خلیل آزاد
No comments:
Post a Comment
Note: only a member of this blog may post a comment.