کسے نتیجے تے آ نہیں سکیا سوال میرا جواب تیرا

 کِسے نتیجے تے آ نہیں سکیا، سوال میرا، جواب تیرا

عمل دی پَھٹی تے کیہنے لِکھیا، گناہ میرا، ثواب تیرا

بڑے ہی سُورج دے خواب دیکھے، بڑی سی چانن دی رِیجھ مینوں

کی کردے، پڑھنا جو پئے گیا سی، ہنھیریاں دا نصاب تیرا

ہزار لہو دے وگائے اتھرُو، ہزار رُتاں دے لائے میلے

کدے نہ اُتری اُمید ٹھنڈک، کدے نہ اُگیا گلاب تیرا 

اجے وی تینوں گِلہ اے میری وفا 'چ کوئی کمی اے باقی

میں سِہ رہا واں عذاب تیرا، میں جَھل ریا ہاں عتاب تیرا

نہ رات نھیری دے چھیڑ قصے، نہ بِھجدے اتھرو دی پُچھ کہانی

میں دن دے چانن چ لا رہا واں، اجے تے سجناں حساب تیرا

ہزار دریا سی راہ چ دیکھے، ہزار کانگاں نظر چ گھمیاں

بھلیکھیاں دے مسافراں توں، نہ پھر وی مُکیا سراب تیرا

وفا دی دھرتی پکاردی اے، بچا لے آ کے تُوں پھیر وارث

لہو چ تبدیل ہو نہ جاوے، محبتاں دا چناب تیرا

غلام مصطفیٰ بسمل