رنگ چٹا تے اکھ کالی یار اخیر اے

 رنگ چِٹا تے اکھ کالی، یار اخیر اے

زُلف کُنڈل بُلاں تے لالی، یار اخیر اے

چن توں سوہنڑا، پُھلاں توں مِٹھا

نال آواز مثالی، یار اخیر اے

اوہ منگے گُلفام، میں عاماں چوں عام

اوتوں جیب وی خالی، یار اخیر اے

ونگاں بانہہ وچ پائیاں، کرے پِتل وڈائیاں

نچے کن دی والی، یار اخیر اے

ہے مَن دا بھولا، نئیں سُن دا رولا

سمجھدا دنیا حلالی، یار اخیر اے

ہک اُنج لاپرواہ، اتوں دَسے نہ بھا

مٹی رُل گئے سوالی، یار اخیر اے

قدرت دے رنگ، بیٹھے بُوہے تے ملنگ

نہ دربار نہ قوالی، یار اخیر اے

پوندے کمر اِچ بل جداں نچے چنچل

اُتوں مار دا تالی، یار اخیر اے

ہک چن زمیں تے، دُوجا گزارا یقین تے

بُوہے لیندا نہ جالی، یار اخیر اے

ہک عُمر کچی دُوجا کچی جُھگی

تِیجا باوا وی موالی، یار اخیر اے

آفتاب چکوالی

آفتاب احمد خان