تھے ہوت آ سسی دے باغ اندر چوغے کار چوبی زرنگار دامن
شعلہ رُو جاں حشر دی چال چلن مارن بجلیاں وانگ لشکار دامن
پتے پُچھیاں جدوں بلوچ دسن لوکیں چُمدے نال پیار دامن
کنبدے پھرن دل کئیاں نمانیاں دے کھلے چھڈ کے میر شکار دامن
محرم دِلاں دے آن مہمان ہوئے لنگھے کھول جاں سرِ بازار دامن
مخبر سسی نوں وی پتے آن دِتے لے شہزادئیے اَج سوار دامن
بغلوں کڈھ تصویر ملان لگی گھڑی خوشی دی جویں دلگیر ویکھے
ویکھے کدی تصویر تے کدی پنوں کدی پنوں تے کدی تصویر ویکھے
پایا رُوپ بہروپ دا اکھیاں نے بیٹھا کول صیاد اسیر ویکھے
مِلیا مال تے چور دی لادھ ہوئی سسی ہوت جاں نال نظیر ویکھے
پلا پنوں دا دوڑ کے پگڑ ہتھیں ول کے کر لیتو سو گل دا ہار دامن
جاتا عاشقاں حشر بپا ہویا پگڑ کھلا جاں یار دا یار دامن
ڈاکٹر فقیر محمد فقیر
No comments:
Post a Comment
Note: only a member of this blog may post a comment.