دو بازار مدینے اندر بھاری رونق والے

 مدینے بارے بیان

دو بازار مدینے اندر بھاری رونق والے

بہت بڑے مشہور تے سوہنے سبھ تھیں وڈے نالے

ہک ہے باب سلاموں لے کر باب المصری تائیں

قسموں قسم دکاناں جس وچ رنگ لگے ہر جائیں

دوجا باب باب الرحمۃ کولوں باب شامی تک جاوے

اس دے وچ بھی طرح طرح دا سودا سود وکاوے

باجھ ایہاں تھیں چھوٹے چھوٹے ہور بازار جو آون

ہے اک سوق الخضرا جس وچ سبزیاں سبھ دکاون

ہک ہے سوق حبابہ اس نوں ہور بھی کجھ اکھیندے

ہر ہک قسم کھجوراں میوے اس دے وچ وچیندے

ہے اس سوق ثمارا اس وچ وکن سبھ غذائیں

چاول کنک تے گھی کھنڈ آٹا دالاں مرچاں تائیں

ہک ہے سوق طباخہ جس وچ نان بائی بھٹیارے

عربی رسم مطابق کھانا ملدا اس بازارے

ہک سوق ابراہیم ہے جس وچ جانوراندا چارا

گھاس وغیرہ ملدا جس دا ہے اوتھے ورتارا

ہک سوق الہراج ہے جس وچ ہیں نیلام کریندے

بدوی لوک زیادہ اس وچ سودے لیندے دیندے

مولوی محمد دلپذیر بهیروی