جدید پنجابی شاعری
کی دساں میں کہڑی گلوں جِتی بازی ہار گیا
جنہوں منصف پایا اوہی مینوں چار گیا
لہو رنگیں او اتھرو جیڑھا پلکیں زوریں ڈِیگا سی
ڈِگدا ڈِگدا کئی سجناں دے پیار دے بھار اتار گیا
نہر کنارے میلہ لگیا لوکی پُچھدے پِھردے نیں
ڈوبن والا کاغذ دی اک کشتی کاہنوں تار گیا
تیری اک اکھ سہارا دِتا میریاں ٹُٹیاں آساں نوں
تیرا اک دِلاسہ چناں میرا بتا سار گیا
اک اٹی توں پیار دا سودا ایتھوں کتھے لبھنا ایں
جدھر ٹُر گئے حُسن بیوپاری ادھر او بازار گیا
ایہو ایک ودھائی میری میں بُوہا کھڑکایا نیں
وچ خیالی بھانویں بوہے اودے لکھاں وار گیا
کوئی موت بہانہ یارو میری موت نوں ملیا نہ
مینو اپنے اندروں اٹھدا ہویا ہوکا مار گیا
پرلے پار اڈیکن والے بزدل کہ کے ٹر گئے نیں
ارلے کنڈے آکھن لوکی انور پرلے پار گیا
رشید انور
No comments:
Post a Comment
Note: only a member of this blog may post a comment.