جدید پنجابی شاعری
پنجابی اکھر
جدوں راہ وچ بیریاں ککراں نیں فر ہر اک خار توں بچاں کیویں
چوکیدار ملے نیں چوراں ناں میں چھری تلوار توں بچاں کیویں
سب اپنے دشمن ہوئے نیں تائیوں نین نمانے روئے نیں
جدوں سجن ویری ہو جاون فیر لُکی یلغار توں بچاں کیویں
جہناں فیصلہ دینا وِک گے نیں اوہ پہلوں ای سب کجھ لکھ گے نیں
جہنی مرضی جان لگا دیواں پئی دسدی ہار توں بچاں کیویں
جے نفرت دسے چھڈ دیواں اوہنوں دل دے وچوں کڈ دیواں
میں بندہ سدھے دل دا ہاں دس دوغلے پیار توں بچاں کیویں
ہر انگ تے آپ ٹکور کراں ہوکے ہاڑے ٹھنڈی آہ بھراں
اس پیار میدان دے وچ کھادی شبیر میں مار توں بچاں کیویں
شبیر حسین شبیر
No comments:
Post a Comment
Note: only a member of this blog may post a comment.