جدید پنجابی شاعری
ویر ورودھ نے اتاں چائیاں، پیاراں دا رب وارث
فکے پیندے جان یرانے، یاراں دا رب وارث
ڈُبدے سورج وانگ کہانی چھیکڑ تے آ پُجی
پہلے دن دے کیتے قول قراراں دا رب وارث
گاٹے توڑن والیاں پنڈاں پھاہ نہ مارن کدھرے
بھارے چائی پھردے دُنیا داراں دا رب وارث
لیوڑ لتھیا ہویا وی جو کجن کجی کھڑھیاں
ویلے دے شرلاٹیاں وچ دیواراں دا رب وارث
ویکھن پئے تنویر چپیتے ساقی دے منہ ولے
اج سمیں دے ٹھیکے وچ مےخاراں دا رب وارث
تنویر بخاری
No comments:
Post a Comment
Note: only a member of this blog may post a comment.