جدید پنجابی شاعری
پاگل اک بیٹھا سیگا نہر اُتے جا کے
بہہ گیا اوہدے کول مُلاں اک آ کے
چنگا بھلا گھبرو ایں لگنا تُوں مویا ایں
مُلاں اوہنوں پُچھدا پاگل کیویں ہویا ایں؟
کہن لگا پاگل; گل غور نال سُننا
نکی جنی گل اے تے ٹوہر نال سُننا
بڈھی میری مر گئی تے لیا میں پھاہ سی
کُڑی اک بیوہ نال کیتا میں ویاہ سی
ہُندی نہیں میں سُنیا اے جنگ کھیڈ بالاں دی
نال اوہدے آئی سیگی دھی سولھاں سالاں دی
اوکھا سوکھا ہو کے میں ایہہ وی پیڑ جر لئی
اوہدے نال میرے بھائیا! ابے شادی کر لئی
ہو گیا لٹو تے سودائی بن بیٹھا سی
میرا ابا میرا ای جوائی بن بیٹھا سی
دُھپ وانگوں مینوں ہُن چھاں سیگی لگدی
میری دھی میری ہوئی ماں سیگی لگدی
اللہ اوہنوں دھی دتی اوہدا سُکھ چین سی
کریے حساب میری لگدی او بھین سی
اپنے ای گل دا میں بن گیا پھندا ساں
اوہنوں کیہ پتا سی اوہدی نانی دا بندا ساں
اودھروں جے ویکھئے تے گل چنگی خاصی سی
ایدھروں جے ویکھئے تے میری اوہ نواسی سی
پُت میرا بن گیا ہاسا سارے جگ دا
اپنی اوہ دادی دا بھرا سیگا لگدا
اودھروں جے ویکھئے میں پُت دا بھنیواں سی
ایدھروں جے ویکھئے تے بچدا وڑیواں سی
مُلاں آہدا نس جا کہ میرے کولوں مرنا ای
چَولا جہان دیا مینوں پاگل کرنا ای
عارف شاد
No comments:
Post a Comment
Note: only a member of this blog may post a comment.