جدید پنجابی شاعری
انج تے فر انج ای سہی
ویلے دی ایہہ تیز ہنیری
قہر دے جھکّڑ، واء، ورولے
کالی رات دے وحشی جتّھے
سارے رل کے زور پئے لاندے
سوچ دا دِیوا بلّن نئیں دینا
اکھاں میریاں انہیاں کر کے
خواب وی میتھوں کھوہ لینے نیں
آس دے پُھل سُکا دینے نیں
پر اج فِر اک واری سُن لو
راہوں ڈکو، بھانبھڑ بالو
جِناں ٹِل جے سارا لا لو
سچ آکھن توں میں نئیں مُڑناں
اپنے خواب میں ونڈدیاں رہنا
رب دی سونہہ! الطاف دی ضِد اے
ہنیریاں نال مُتکّا لا کے
سوچ دا دِیوا بالی رکھنا ایں
اپنی رت دا پانی دے کے
آس دا بُوٹا پالی رکھنا ایں
الطاف بخاری
No comments:
Post a Comment
Note: only a member of this blog may post a comment.