جدید پنجابی شاعری
کیتی درد اخیر وے سائیں
تن من لِیرو لِیر وے سائیں
ادھی راتی شور مچاندی
ہاواں دی زنجیر وے سائیں
من چولے دے سُوت نوں رنگ کے
کر دے سبز حریر وے سائیں
زیاده میل تے صابن تھوڑا
کی ہووے تدبیر وے سائیں
ہجر عذاباں سہندی ویکھی
عشقے دی تقدیر وے سائیں
من مندر جے ڈھے جاوے تے
اوکھی اے تعمیر وے سائیں
یار سوا ہُن لبھنا کُجھ نئیں
لے خنجر دل چِیر وے سائیں
اِذن بنا تے مٹ نئیں سکدی
متھے دی تحریر وے سائیں
نفس مُرید وی ہو جاندا اے
من جے ہووے پِیر وے سائیں
رانجھن رانجھن وِرد پکا کے
رانجھن ہوئی ہیر وے سائیں
محرم کہہ کے رہندا اولے
ڈاڈی آں دلگیر وے سائیں
بھر دے اِنج تو کاسہ من دا
آکھن لوک فقیر وے سائیں
ہنجو، ہاڑے، تانگ مِلن دی
ساڈی کُل جاگیر وے سائیں
آتش من دی لوں لوں ساڑے
عشق دی اے تاثیر وے سائیں
محمد نواز آتش
No comments:
Post a Comment
Note: only a member of this blog may post a comment.