جدید پنجابی شاعری
قاصد ہتھ سنیہا گھلدا رہناں واں
آپ وی اوہدے پِچھے چلدا رہناں واں
تیرا خط جِسراں کُرتا پیغمبر دا
پڑھ پڑھ کے اکھاں نُوں ملدا رہناں واں
اندر میرے نھیرے نپے ہوئے نیں
اُتوں سُورج وانگوں بلدا رہناں واں
اووی مینوں ہی بدلن دی گل کردا
میں وی اپنا آپ بدلدا رہناں واں
دُکھ دی بھٹی وِچ دھریا اے دل اپنا
واری واری پاسا تھلدا رہناں واں
منتظر بٹر
No comments:
Post a Comment
Note: only a member of this blog may post a comment.