جدید پنجابی سرائیکی شاعری
کسے سفیر لگھنڑا اے
کسے مشیر لگھنڑا اے
تساں انسان او ہٹ ونجو
اتھوں وزیر لگھنڑا اے
پولیس آکھدی
ناکہ تینوں نئیں دسدا
شے کئی چاہدی اے تے کل آویں
غریبا تینوں زندگی دی بھلائی چاہدی اے تے کل آویں
دیہاڑی چھوڑ نعرے لا
کمائی چاہیدی ای تے کل آویں
اگر مریض مردا پیا اے
دوائی چاہیدی ای تے کل آویں
اج تے راستے بند ہن
پولیس دے پیر لگھنڑا اے
تساں انسان او ہٹ ونجو
اتھوں وزیر لگھنڑاں اے
دیہاڑی بند، دکاناں بند
علاقے دی شاہراہ بند اے
اِدوں ناکہ، اُدوں ناکہ
ابھردے آونڑاس تے راہ بند اے
عوامی رہنما لگھنڑا ایں
عوامی راہگزر بند اے
اج دے دن مدرسہ کیا
مسیتاں دا وہ راہ بند اے
کسے فرعون لگھنڑاں اے
یا دستگیر لگھنڑاں اے
تساں انسان او ہٹ ونجو
اتھوں وزیر لگھنڑاں اے
جھنڈیاں لے کے بچے سائیں
سڑکاں دے اُتے کھڑدے پے ہن
استقبال ترے وچ اے پُھل
دُھپاں وچ سڑدے پے ہن
ایہ ہا تہذیب تیڈی اے
یا تعلیم پڑھدے پے ہن
نویں صدی ترقی دی اے
کی ہا جئی پُہڑی چڑھدے پے ہن
اقبال ہوراندے خواباں دی الٹ تعبیر لگنا اے
تساں انسان او ہٹ ونجو
اتھوں وزیر لگھنڑاں اے
ہک منظر یاد آندا پیا اے
سرکار عمرؓ دے ہتھ اچ اے
مدینے توں فلسطین تک
ہر شہر عمرؓ دے ہتھ اچ اے
ہزاراں لکھاں فوجاں دی
قطار عمرؓ دے ہتھ اچ اے
مگر نوکر ہے ڈاچی تے
تے مہار عمرؓ دے ہتھ اچ اے
جاوید راز
No comments:
Post a Comment
Note: only a member of this blog may post a comment.