جدید پنجابی سرائیکی شاعری
ہائے ہائے او ویلے نئیں بھُلدے
جڈاں تھِگڑیاں بدھ کے کانے تے
بھا لیندے ہاسے کھَکھریں کوں
جڈاں پہلی واری وَستی وِچ
بَس ہارن آن وگایا ہا
اوں ساڈا مال ڈرایا ہا
جڈاں ٹوکرے لا کے ویہڑے وِچ
کَئی چِلکدے چِڑیاں نَپ نَپ کے
کوئی خاص نشانی لا ڈیونڑ
پُچھ پَٹ کے انت اُڈا ڈیونڑ
ہائے ہائے او ویلے نئیں بھُلدے
او چِیک چہاڑا چُلہے تے
اے پہلی روٹی میں کھاساں
ایں گالھ تے رولے ہوندے ہَن
جڈاں سکھڑیں چولے ہوندے ہَن
جڈاں ہین خزانے پلوں وِچ
او لُک چھَپ لُک چھَپ کھیڈدیں ہوئیں
کدی لکڑاں نال کلہوٹی دے
کدی تاک دے اوڈھر لُک ونجڑاں
ساہ سُک ونجڑاں
جڈاں پوہ دیاں لسیاں کھِمنڑیں وِچ
کوئی پِینگھ فلک تے آوے ہا
ساڈی تاڑی پینگھ تائیں ویندی ہائی
او رات دی ما دے ڈر کولوں
ساڈا شام توں پہلے سم ونجڑاں
ہائے ہائے او ویلے نئیں بھُلدے
او ویلے کیویں بھُل سگدِن
جڈاں آکھیا ہا اُستاد ساکوں
چلو تختیاں چئو، اِملا لِکھنڑئے
میڈی مَس کونہی، میں رُنا ہم
میڈی ہَنج کوں پونجھ کے تئیں سانول
دو پُڑیاں میکوں ڈتیاں ہَن
تیڈے ڈو پُڑیاں میں ہالیں تائیں
مخمور قلندری ڈیونڑیاں ہِن
مخمور قلندری
No comments:
Post a Comment
Note: only a member of this blog may post a comment.