جدید پنجابی سرائیکی شاعری
لیر کتیر حواس اساڈے
چٹے کھیر لباس اساڈے
کھیر جو ناں ہن قسمت دے وچ
دھنولے نہیں تھئے راس اساڈے
ول دھرتی توں پھٹ پیاں ہنجوں
ڈیکھ کے نین نراس اساڈے
جیں ڈینہہ دی اوں چپ ہے کیتی
دل ہن یار اداس اساڈے
شالا کوسی واء نہ لگی
توں نہ کر وسواس اساڈے
جھنڑکاں ڈے نہ روک اساکوں
روح ہن پکھی واس اساڈے
زہر کوں زہر سمجھ کے پیندوں
ڈیکھ تاں سہی ہبلاس اساڈے
شہد توں مٹھے بول لباں تے
کوڑے اک احساس اساڈے
زہر جو تھی گئے تیڈا لہجہ
لٹئے گئین امٹھاس اساڈے
اپڑیں ذات دی کوٹھی دے وچ
تھیندن نت اجلاس اساڈے
پتھر دل ہے ساہ دا ساقی
کچ کروڑ گلاس اساڈے
شاہد! اتنیاں تنگ ہتھکڑیاں
کون ءن دست شناس اساڈے
عزیز شاہد
No comments:
Post a Comment
Note: only a member of this blog may post a comment.